Gcina (Julayi 2013)

2013 Julayi 31, Lwesithathu

Ukuba ke uthe wanqula mna Ndikhoyo uThixo wakho, ndiya kukuthamsanqela ngokutya namanzi, ndikutshayele ukufa kungabikho phakathi kwenu.

EYEMFUDUKO 23:25 unqulo intsikelelo ukugula

2013 Julayi 30, Lwesibini

Ndibonise indlela yakho, Ndikhoyo;
ndifundise iindlela zakho.

INdumiso 25:4 ubomi ukufunda

Nakuba ubume bakhe babunguThixo ngenkqu,
ukulingana noThixo akakubawelanga
kangangokude afune ukusunduzana naye.
Ndaweni yaloo nto waziqongqotha ubuyena,
wathatha isimo sesicaka,
waba ngumntu ncakasana.
Engumntu ebantwini,
wazambesa intobeko,
ntobeko leyo yamsa ekufeni –
ukufa kwasemnqamlezweni.

KWABASEFILIPI 2:6-8 UMsindisi ukuthobela UYesu

2013 Julayi 28, Cawe

Ndiyambongoza ukuba ngobubele bakhe uSosidima anomeleze imo yenu entsha ngoMoya wakhe, khon' ukuze ngokholo uKrestu ahlale ngaphakathi kuni. Nanga ningasekelwa eluthandweni nendele.

KWABASE-EFESE 3:16-17 ukholo uthando Umoya

2013 Julayi 27, Mgqibelo

NguNdikhoyo ixhadi lakho lakubhek' umoya;
ewe, uya kukwalusa ungachukunyiswa nto.
Ngenene, uNdikhoyo uya kukwalusa,
xa uhambayo naxa ubuyayo,
kuqalela ngoku kude kube nini-nini.

INdumiso 121:7-8 ithemba ubomi ububi

2013 Julayi 26, Lwesihlanu

Ngenani ngesango elimxinwa, kungabi ngelibanzi, kuba abangena ngesango elibanzi, bahambe ngendlela ephangaleleyo, basinga entshabalalweni; yaye baninzi abenjenjalo. Ke abangena ngesango elimxinwa, bahambe ngendlela ecutheneyo, basinga ebomini; yaye bambalwa abenjenjalo.

UMATEWU 7:13-14 ubomi obungunaphakade usindiso

2013 Julayi 25, Lwesine

Kambe ke bona abakholosa ngoNdikhoyo
bosuka bahlaziyeke bomelele.
Bosuka bantinge baxel' ukhozi;
noba sebebaleka, soze badinwe;
ewe, baya kuhamba bangaze batyhafe.

UISAYA 40:31 ithemba ukhuthazo amandla

2013 Julayi 24, Lwesithathu

Nina madoda, bathandeni abafazi benu, kanye ngale ndlela alithande ngayo uKrestu ibandla, waza wanikela ngobomi bakhe ngenxa yalo. Le nto uyenze ukuze libe libango lakhe ibandla. Ulicocile walihlamba ngamanzi ngamandla elizwi lakhe.

KWABASE-EFESE 5:25-26 uthando ukusulungekiswa ubudlelwane

2013 Julayi 23, Lwesibini

Ke uNdikhoyo uya kuba ngukumkani wehlabathi jikelele. Ewe, ngaloo mini iya kuba nguNdikhoyo yedwa, igama lakhe libe kuphela kwagama elitshatsheleyo.

UZAKARIYA 14:9 uThixo ubukumkani

2013 Julayi 22, Mvulo

Unebhongo umzali womntwana olilungisa;
ewe, umntwana osisilumko uligugu kubazali bakhe.

IZAFOBE 23:24 uvuyo ubulumko usapho

2013 Julayi 21, Cawe

Culelani uThixo, nibong' igama lakhe.
Ewe, mbongeni lowo ucand' emafini.
Igama lakhe nguNdikhoyo, vuyani ngenxa yakhe.
UThixo usendlwini yakhe engcwele.
Nguyise weenkedama, umthetheleli wabahlolokazi.

INdumiso 68:4-5 ubungcwele ukhuseleko unqulo

2013 Julayi 20, Mgqibelo

Kuba othe wafuna ukusindisa ubomi bakhe, wolahlekelwa bubo, kodwa othe wabuncama ubomi bakhe ngenxa yam, wobusindisa.

UMATEWU 16:25 usindiso ukufa ubomi

2013 Julayi 19, Lwesihlanu

“Ikhona na indawo efihlakeleyo apho umntu angazimela khona ukuze ndingamboni?”
Lowo ngumlomo kaNdikhoyo.
“Asindim na lowo ukho ngokupheleleyo ezulwini nasemhlabeni?”
Lowo ngumlomo kaNdikhoyo.

UJEREMIYA 23:24 uThixo izulu

2013 Julayi 18, Lwesine

Wanga ke uThixo, osinika unyamezelo nenkuthazo, anganenza nibe moya mnye ngokwentando kaKrestu Yesu.

KWABASEROMA 15:5 uluntu ukhuthazo umonde

2013 Julayi 17, Lwesithathu

Nyamezelanani, nixolelane. Ukuba omnye ukhalazela omnye xolelanani kwanjengokuba nayo iNkosi yanixolelayo.

KWABASEKOLOSE 3:13 uxolelo uxolo ummelwane

2013 Julayi 16, Lwesibini

Impendulo ethambileyo iyawuthibaza umsindo,
kanti ke wona amazwi akrwempayo ahlobisa igazi.

IZAFOBE 15:1 ukuthetha ubulali umsindo

2013 Julayi 15, Mvulo

Uthetha ngelizwi athi:
“Phezani, ndim uThixo.
Ndizivelele izizwe;
nehlabathi ndilikrobele.”

INdumiso 46:10 uThixo uxolo

2013 Julayi 14, Cawe

Nina ke, bazali, abantwana musani ukubaphatha gadalala, bade babe nenzondo, koko banikeni ingqeqesho nemiyalo yobuKrestu.

KWABASE-EFESE 6:4 umthetho usapho abantwana

2013 Julayi 13, Mgqibelo

Kuba kaloku komnceda ntoni umntu, ukuba uthe walizuza ihlabathi liphela, kodwa walahlekelwa bubomi bakhe?

UMARKO 8:36 ukubawa ukuthanda izinto eziphathekayo ubomi

2013 Julayi 12, Lwesihlanu

Ithembekile yona kambe iNkosi. Yonikhusela inigcine kuhlaselo lwendoda enobuqhokolo.

2 KWABASETESALONIKA 3:3 ukuthembeka ukhuseleko amandla

2013 Julayi 11, Lwesine

Nize ningabi nanqala mntwini. Mkhalimele umntu owonayo, hleze nawe ube netyala. Ze ningaziphindezeli mntwini, okanye nimbambe isixhiba, koko nina mthandeni ummelwane wenu, kanye ngale ndlela nizithanda ngayo. Kutsho mna Ndikhoyo.

EYONQULO 19:17-18 uthando ubulali umsindo

2013 Julayi 10, Lwesithathu

Kanti ke thina ikomkhulu lethu lisezulwini, apho silindele ngolangazelelo ukuba uya kuvela khona uMsindisi wethu, iNkosi uYesu Krestu.

KWABASEFILIPI 3:20 usindiso UYesu izulu

2013 Julayi 9, Lwesibini

Ukuba ngoko nina, nikhohlakele nje, niyakwazi ukubapha abantwana benu izipho ezilungileyo, wobeka phi yena uYihlo osezulwini ukugqithisela ukubapha uMoya oyiNgcwele abo bamcelayo?

ULUKA 11:13 Umoya umthandazo usapho

2013 Julayi 8, Mvulo

Ndibhenela kuwe, Thixo wam:
khawundigoca-goce, undiphicothe, undiqondisise;
ndivavanye uziqonde iingcamango zam!
Ndiqwalasele, hleze ndithi kanti ndiphambukile;
undikhokelele kwindlela eyeyona-yona.

INdumiso 139:23-24 ubomi obungunaphakade ubungcwele ubulungisa

2013 Julayi 7, Cawe

Ke bona abahlwayeli boxolo abaseluxolweni bavuna ubulungisa.

EKAYAKOBI 3:18 ubulungisa uxolo ukuvuna

2013 Julayi 6, Mgqibelo

Kodwa ke bona ubulumko obuvela phezulu bumsulwa; bunolungelelwano, nobubele, buyazelelela. Bona bunovelwano, yaye buvelisa imisebenzi emihle; abunamkhethe naluhanahaniso.

EKAYAKOBI 3:17 ukunyaniseka uxolo ubulumko

2013 Julayi 5, Lwesihlanu

Egameni leNkosi yethu uYesu Krestu ndiyanibongoza, mawethu, ukuba nivane, nithethe nto-nye, kungabikho zimbambano phakathi kwenu. Manyanani nibe luqilima, nimxhelo mnye, ninazimvo zinye.

1 KWABASEKORINTE 1:10 uluntu usapho inguqu

2013 Julayi 4, Lwesine

Ngoko ke sisondela singenaxhala kuThixo, sisazi ukuba uyasiphulaphula xa sicela silungele ukwenza loo nto athanda ukuba siyenze.

1 KAYOHANE 5:14 thembela umthandazo ukuphulaphula

2013 Julayi 3, Lwesithathu

Andithi na kaloku ndadalwa nguwe;
nditsho mna kanye lo!
Ewe, wandixonxa wandilunga-lungisa kwandisekumama.
Ndikubonga ndikubulela ngenxa yomntu endinguye,
ngenxa yokumangalisa nokukhwankqisa kwento endiyiyo.
Ewe, iyakhamnqisa kambe imisebenzi yakho.
Leyo ke into ndiyiqonde pheleleyo.

INdumiso 139:13-14 indalo imimangaliso umphefumlo